famulantibus organis circumposita, huic membranæ transuersi adeo connascuntur, ut arduum sit, illos ab hac in homine illaceros liberare. Carnosæ tamen musculorum partes, uix aliter peritonæo committuntur, quam mutuo incumbentes musculi, inuicem hærere solent. Transuersi enim musculi propria musculorum membrana illic, qua peritonæo obducuntur, neutiquam (et si plerique secus arbitrentur) destituti secantibus occurrunt. Neque unquam alius musculorum abdominis, quam nunc enarrauimus, situs uisitur. Vti forsitan aliquis librorum duntaxat ope nautam agens, prompte colligeret, pugnantibus nimirum Galeni locis delusus. Quandoquidem hos aliter recenset in Libris de Affectorum locorum cognitione, rursus aliter in Libris de Partium usu, et aliter prorsus in Libris de Administrandis sectionibus, ubi eos ita enumerat, ut in Sexto libro curatiuæ methodi ipsorum situm recte describit.Abdominis musculorum usus. Octo abdominis musculi, præter communem omnium musculorum usum, quo corpori calefaciendo, refrigerandoque auxiliantur, et propugnacula quædam censentur, primario usu thoracis motibus præsunt, ut in proprio de thoracem mouentium musculorum Capite dicturi sumus prolixius. Deinde homini ad durorum recrementorum expulsionem aptissime subseruiunt, quando enim omnes simul tensi laborarunt, septo transuerso interim ex spiritus retentione depresso, ita intestina simul comprimunt, ut ex angusto loco in ampliorem (qui inferior est) fæces protrudant, expellantque, et rursus ad uentriculum superiora'ue illas deferri, præcaueant nihilo secus, quam si duabus ad brachiale tantum iunctis manibus, et semper magis magisque sensim ad extremam usque digitorum aciem distantibus, madentem spongiam imponeres, et manibus paulatim coëuntibus, aquam exprimere nitereris. Verum hoc musculorum abdominis munus, nisi cognita septi transuersi functione situque, aperte percipi nequit. Pari etiam ratione, quo pacto parientibus abdominis musculi (ut commodius fœtus propellatur) conferant, non apte cognoscit. Atque hæc adhuc minus ab illis assequuntur, qui septum transuersum, dum contrahitur, thoracemque adaperit, deorsum pelli arbitrantur, non animaduertentes, quum aërem intro ducimus, ac thoracem continuo, citra spiritus retentionem, thoracisque repleti compressionem distendimus, septum transuersum nullum impetum in excretione moliri, quod scilicet perpetuo sursum tractum non deprimatur, quemadmodum id in firma sede, retento spiritu, et ui interim compresso thorace, permanet. Cæterum nostri seculi medicos, qui hos tantum musculos recensere ita uidentur, ac si alij in corpore nulli essent, omnino delirare existimandum est, qui rectis musculis cibum in uentrem attrahi, transuersis autem expelli, et obliquis retineri contendunt, præsentibus musculis attribuentes, quod uere uentriculi intestinorumque fibris asscribendum fuerat. Sed hæc absurdiora sunt, quam quæ in medium adduci debeant, quum aliæ fibræ uoluntario motui, aliæ uero naturali, qui a nostro non pendet impetu, famulentur. Neutiquam sane hæc ab ipsis confingenda uenerant, at laudandus erat rerum Opifex, qui quum abdomen osse destitutum necessario creari uoluit, tam affabras tunicas, inuolucraque ipsi parauit, quæ præter quod tegumenta, et aptissima receptacula sunt, thoracis quoque motibus, uti monuimus, utilissime subministrant.

Duplicem esse horum musculorum administrationem. ADMINISTRATIONEM hanc, aut a musculorum capitibus, aut tendinum terminis aggredi nihil prohibet. Verum facilior est, musculorumque naturam accuratius commonstrat, quæ ab exortibus auspicatur. Qualitercunque igitur sectionem exordiri proposueris, cutem una cum carnosa membrana, ab uniuerso abdomine, et lumborum regionibus, ad femora usque liberatum esse oportet, una cum musculo, quem brachium deorsum trahere ostendimus, quanquam is iampridem ex sectionis serie, simul cum cute ac membrana, in brachium mouentium musculorum sectione ablatus sit. His ademptis, et perquam tenui fibrasaque membrana musculis, præter carneam, obducta, unguibus hinc inde leuiter (ut ipsius naturam discas) diuulsa, priorem sectionem in hunc modum aggredieris.Administratio a musculorum exortu. Cadauer ad alterum latus inuoluendum est, ut commode et lumborum uertebris, et abdominis medio manus adhibeas.Oblique descendentis. Deinde a dextra costa niteris musculi abdominis oblique descendentis principium, paruo cultello, aut exigua nouacula liberare, leui sectione ducta secundum reliquas costas uersus dorsum, et secundum superiorem ilium ossis regionem, ad pubis ossis usque medium : hanc sectionem adeo duces leuiter, ut nihil præter præsentem musculum uulneres. Mox ab his ossium regionibus elevato musculi principio, conaberis paulatim ab oblique ascendente, descendentem eousque liberare, dum ad abdominis usque medium illum perduxeris, præcauens ne una tanquam oblique descendentis musculi partem auferas, tenuem musculum, qui ad decimam undecimamque thoracis costam, cum obliquo mutuis interuallis committitur. Si enim