Ms BIU Santé no 2007, fo 69 ro.
Cl. viro D. Vander Linden, Med. Doct. et Prof. Leidam.
Nihil habeo quod ad Te scribam de Aretæo, cujus negotium totum in
se recepit amicus noster D. Friese Romphius. De Celso, totus est in illo recen-
sendo D. Io. Rhodius, quod ad me nuper Bruxellæ scripsit mihi
amicissimus D. Rob. Farvaque, Medicus Bruxellensis, vir optimus,
à quo plura scire poteris, si opus fuerit, cùm sit amicus Io. Rhodij.
Nardi Noctes geniales ad Te mittam : (ejusdem est amplitudinis quàm
tua Selecta Medica :) cum Scholijs Personæ in Galenum de venæ sect.
Nihil adhuc pro Te expendi, nec ullæ sunt apud me rationes, quàm eorum
quæ à Te accepi, quæ magna et multa sunt : plurimùm sum in ære tuo,
et quam multa me Tibi debere, varijsq. modis candidè profiteor ; sed
spero me Tibi bonum nomen futurum, si Deus dederit. Fasciculum
nostrum antehac Elzevirij famulo traditum, utinam acceperis ; alterum
adornabo quando prodierint Io. Heurnij Opera, in fol. quorum editio non procul
est à meta.
