Ms BIU Santé no 2007, fo 78 vo.
Clariss. viro D.D. Io. Ant. Vander Linden, Med. Doct. et Prof. Leidam.
Triplici nomine ad Te scribo, Vir Cl. 1. Tibi supplicaturus ut carissimum habeas nobilem adolescentem
Parisinum, Dominum Brochant, mihi amicissimum, qui hasce Tibi reddet. 2. ut per me salutes
D. Elsevirium, cujus dono accepi duas Oratiunculas, quas mihi reddidit juvenis quidam
Mercator Parisiensis : qui cum esset in Hollandia, eo solo nomine Leidam concessierat, ut Te videret
atque salutaret. 3. ut habeas titulos duotrium librorum, quos nuperrimè accepi ex Italia,
qui sequuntur. Bibliotheca Botanica, seu Herbaristarum Scriptorum promota Synodia :
Cui accessit individualis Graminum omnium ab Auctoribus huc usque observatorum nume-
rosissima Nomenclatura. Io. Antonio Bumaldo Collectore. Ad Illustrissimos Bonon.
Senatores Archigymnasij ejusd. Civit. Præsides sapientissimos. Bononiæ, typis Heredis
Benatij, 1657. Superiorum permissu. 24. Pestis Neapolitana, Romana et Genu-
ensis, annorum 1656. et 1657. fideli narratione delineata, et Commentarijs illustrata :
Dictante suis Medicinæ practicæ studiosis Petro à Castro, D.M. Physico Veronensi. Veronæ,
typis Rubeanis, anno Ch. 1657. Superiorum permissu. Io. Rhodij Observationum
Medicinalium Centuriæ tres. Patavij, 1657. Typis Pauli Frambotti Bibliopolæ. Superio-
rum permissu. 8. Præter hæc pauca nihil aliud habeo scribendum ; servet Te Deus Opt.
Max. tuis, Reip. literariæ, et Amicis tuis, de quorum numero me esse glorior, gaudeo,
imò triumpho. Vale carum caput, et me ama. Clariss. viros saluto ex animo D.D.
Van-Horne, Gronovium, Van-Horne Nicolaüs, Vorstium. Hîc prædicatur et decantatur
ingens victoria recens Lusitanorum in Hispanos. Tuus ad omnia G.P.
Datum Parisijs, 14. Febr. 1659.
