Ms BIU Santé no 2007, fo 177 vo.
Clariss. viro D. Bernardo Versaschæ, Basileam.
Ingentens Tibi gratias ago, Vir Cl. pro eleganti tua Epistola, per Glaserum nostrum
mihi reddita : si Riolani nomen, gloriam et singularem eruditionem tuis
scriptis, adversus Zoïlos et malignos obtrectatores tueri pergas, certè paria
facies cum ipso Riolano, viro eximio, qui portentosa sua doctrina et herculeis
in Anatomico studio laboribus, posteros omnes sibi devinxit, et ac æternam famam sibi comparavit,
immortalem, quam soli Zoïli limis oculis aspiciunt : sed abeant illi in rem
suam, in malam rem, in Morboviam, nisi meliorem mentem velint inducere, et
tacere : tamdiu enim stabit et durabit tanti viri gloria quamdiu vivent homines,
et Anatomicæ rei studio suus constabit honos, sine quo nemo potest eruditus
Medicus fieri. Invidorum et malevolorum obtrectationes viris bonis sunt fortiter conter-
rendæ : Et canis allatrat Lunam, nec Luna movetur.
De vestris Decadibus Medicis à Genathio vestro collectis, semper hactenus
et feliciter usus sum : Opus est laude dignum, egregium, et juniorum Medicorum
lectione dignissimum : ideòq. laudo tum consilium, de promovenda nova alia
editione Theseωn similium, quæ ab illis temporibus in Academia vestra in
lucem prodierunt : certè ex eo tanto labore fructus multus in purioris Medicinæ studio-
sos derivabitur, si ista tua collectione sapienter utantur : age igitur, et in
eam curam fortiter incumbes, ut aliquis Typographus ex vestris illorum
editionem adornet, quam Auditoribus meis libenter commendabo, et frequentem
Exemplarium distractionem promovebo, præsertim si prioribus 7. Decadibus,
elegantia atqueoris doctrinæ nomine possint comparari : et hanc gratiam à Te exopto atque
expeto, nomine totius Reip. Medicæ, quæ haud dubiè ex illa tua opera emolu-
mentum et incrementum accipiet. Tibi quoque gratias ago, quod viato-
rem vestrum Academicum monueris in rem meam ; postquam accepero
quæ mihi destinavit, perspecta re scribam, et gratias agam. Intra paucos
dies D. Glasero tradam Hollerium de morbis internis, in folio, novæ editionis,
in quo multa reperies optima, supra doctrinam vulgarem, in ijs præsertim
quæ sunt Lud. Dureti et Io. Hautin : sed quocumque modo Tibi placeat,
mihi gratissimum erit si eo animo munusculum accipas quo Tibi illud offero. Cl.
Salmasij Exercitationes Plinianæ in Solinum hîc sunt rarissimæ : tertius agitur
annus ex quo hîc emi in auctione librorum cujusdam Medici, ut Venetias
mitterentur, 36. libras Turonenses : douze escus : sed vix unquam prostant.
Adhuc sunt rariores ejudem Commentarij in Historiæ Augustæ scriptores : sed
puto novam eorum editionem prostare apud Batavos, ab uno aut altero anno.
Vale qui valere dignus es, et me amare perge. Parisijs, die 18. Oct. 1664.
Tuus ex animo, Guido Patin.
