Ms BIU Santé no 2007, fo 179 ro.
Cl. viro D. Io. Dan. Horstio, Medicinæ Doctori, Francofurtum.
Tres tuas varijs temporibus scriptas simul accepi, Vir Cl. quib. paucis respondeo.
Filius tuus vivit et valet pancraticè. Hospiti suo D. Gayan est carissimus et
commendatissimus : non revertetur in Germaniam nisi doctissimus factus in Opera-
tionibus chirurgicis, quib. quotiescumque fiunt potest interesse. Discit Gallicè
loqui, et jam feliciter balbutit, imò et loquitur : nec spero eum ad vos reversurum,
nisi prius animum suum imbuerit multis optimis artibus : quod ut faciat faxit Deus.
Alter tuus popularis, Medicinæ Candidatus, est mihi tam tuo quàm proprio nomine commendatis-
simus : quamdiu vivam illis adero, et ubi vel quotiescumque opus fuerit ope vel
opere, opera vel consilio juvabo : si periculum feceris, solertem et amicum me
vobis exhibebo. Cl. viri Schneideri in scribendo de Catarrhis miror eruditum
laborem, et operosam diligentiam : tantum virum servet Deus in multos annos.
Postremum ejus librum haud dubiè nostri accipient, à quibus facilè mihi comparabo :
ideóq. rogo Te ne mittas. Gratias Tibi ago de tuis Catalogis. Nullos libros à vobis
postulo, quoniam huc devehuntur ; sed eas dumtaxat Theses et Disput. requiro
quæ haberi solent in vestris Academijs, nec unquam vænales hîc reperiuntur :
utinam tamen per Te possem habere Io. Theod. Schenckij Historiam plantarum
generalem, Ienæ editam à paucis annis : alios aliunde mihi comparabo. Glaserus
noster est vir optimus, Basiliensis, fratrem habet Basileæ, Medicinæ Doctorem,
olim antehac Auditorem meum : hic noster pharmacopœam exercet, sed non
tanquam æruscator aut impostor, quod plerique alij faciunt : imò et ejus
operâ interdum utor pro ægris meis, quibus maximopere placet : est vir bonus,
artis suæ intelligentissimus, et mihi amicissimus : est verè germanus artifex, non
fumi- nec nugivendulus, quod alijs est familiare. Laudano Chymistarum, numquam
utor, est mihi suspectum : sed interdum, sed idque rarò, utor ipso opio tanquam poten-
tissimo narcotico, cujus superandæ malignitati vix sunt pares ægrorum nostro-
rum vires : et in ejus usu Galenum ubique sequor ducem fidissimum, utpote in
cujus scriptis optimæ habentur cautiones de opij usu, ne cadat in abusum :
supra duo grana numquam ascendi, nec pœnitet, nec unquam mihi imposuit,
tunc enim quantum in me est, prudenter ago, quia, ut ait Horatius, me vestigia
terrent. Felix quem faciunt aliena pericula cautum : Laudanum ipsum tot
varijs præparationibus et plusquam ducentis vexatum, Opio ipso minùs
tutum, periclitatoribus et Empiricis relinquo. De Opio tanquam alexi-
pharmaco numquam audivi, nisi quatenus dolores omnes solvit, statim necando,
ut et alia venena : verùm à Te non sic intelligitur. Walæus vir fuit eruditus,
et Chymiæ deditus, sed maximo suo damno adhuc juvenis obijt ex medicamento
stibiato, anno 1649. Væ victis, et præ novitatis studio insanientibus, ac
nimiùm credulis : quantum in me erit ab utroque tanquam venenato sapienter abstinebo.
