Ms BIU Santé no 2007, fo 213 vo.
Cl. viro D. Io. Danielo Horstio, Med. Doctori, Francofurtum.
Vir Cl.
Nobilem illum Suecum, Dominum Pigreum, nondum vidi, sed Suecus alter fasciculum
tuum cum Epistola tua pridie mihi reddidit, in Schola regia ; gratias ago pro Thesibus
vestris, ut et pro Precibus Iac. Horstij. Servet Te Deus cum tota familia, et tuo præ-
sertim Filio, cujus Disputationem Doctoralem totam perlegi : utinam Majorum
suorum vestigia feliciter premat, eósq. imitetur, imò et superet, si fieri possit : quod
ut aggrediatur, et sæpius de tanto facinore cogitet, Et pater Æneas, et avunculus
excitat Hector. De Zacchia vestro ad finem perducto seriò gaudeo : Schonvetterum
vestrum saluto, à quo aliquid expecto ipsi traditum ut mihi redderetur : quod si hîc vel
in tota Gallia, indigeat operâ meâ, omne genus officiorum illi offero, et omnem operam, opus et aut
opem illi polliceor. ^ O utinam vellet cogitare/ de nova editione in fol. omnium. Operum Th. Erasti, viri/ præstantissimi ! Bellicum hîc videmus apparatum, sed contra quem nescitur : videtur
tamen Belgium Hispanicum futurum belli Theatrum. Tuum illum inclitum heroem
et Legatum Suecicum, D. Comitem Königsmarkium, hîc vidi, et sæpius conveni,
salutavi, eiq. colloquutus sum : et hanc gratiam Tibi debeo, supra alia beneficia,
per Te enim mihi innotuit D. de Puffendorf, ei à Secretis, et per ipsum in tanti herois
notitiam perveni : est enim verum axioma philosophicum, Causa causæ est causa causati. ^ Quibusdam è suis ejus nobi-/libus feci Medicinam, eóq. nomine/ mihi decretum fuit oblatum honorarium,/ quod accepi, et pro quo Tibi/ gratias ago. Servet etc. Data occasione/ beneficium referam, et re-/taliabo. ne ingratus videri.
Servet eum Deus cum suis : imò et Teipsum, cum Amico nostro D. Seb. Scheffero :
à quo literas et aliud expecto, quod pro me accepit ante annum à D. Schenkio, Prof.
Ienensi. Interea v. Tu Vir Cl. vive et vale, cum Tuis, et me ama. Parisijs, 3. Febr. 166[7.]
O fœcunda culpæ et calamitatum sæcula ! Hodie 150 milites regiæ cohortis, ex læsa
et adaperta navi perierunt in medio Sequanæ. O tempora !
In ultimis meis duo tria mihi exciderunt præ nimia festinatione. I. Quod olim
à me petijsti, ut indicarem Tibi aliquem librum Gallicè scriptum, qui Latina
veste donatus, utilis esse posset pluribus : de quo sæpius cogitavi : et tandem
post maturam deliberationem, liberè et verè respondeo, omnium nostrorum optimum,
præstantissimum ac utilissimum eum esse qui vulgò vocatur la Sagesse
de Pierre Charon : qui certè fuit sæpius apud nos editus Gallicè, sed nunquam
Latinè versus : editio v. omnium optima est Amstelodamensis, ibidem sæpius
renovata ab aliquot annis : omnium v. editionum prima est Burdegalensis,
quæ primùm in lucem emissa est natali meo anno 1601. Omnibus et singulis profu-
turum spero huncce librum, quoniam est admirabili stylo et logica methodo
conscriptus, nec ullum esse puto in rerum natura qui apud omnes tam verè et tam facilè
Ethicæ Christianæ titulum promereri possit quàm la Sagesse de Charon.
