Ms BIU Santé no 2007, fo 74 vo.
et est fit semper lentum negotium quidquid perficiendum aggrediuntur. Non
dubito Tibi notum est virum literatum et eruditum supra multos alios,
D. Ioan. Rhodium, Danum ; fac quæso ut 2 intelligam 1 per Te, an vivat, an
valeat clariss. ille ac Optimus vir, quid nunc habeat in manibus, moliatur : imprimis
v. quid sperandum nobis supersit de ejus Cornelio Celso, cujus editionem
renovatam, ampliatam et emendatam ante multos annos nobis pollici-
tus est : quamq. eruditi omnes avidè exspectant. Eum quoque, si placet,
meo nomine salutabis, si volueris, ut et Cæcilium Folium, eruditum Anatomicum,
qui fuit amicus Alcidi Musnier, Medici Galli, et Amici mei singularis,
quem pessimo nostro fato nobis eripuit pestilens illa lues quæ ante duos annos
Genuæ grassabatur.
Verùm, antequam desinam, de rebus nostris Te monebo.
Hîc à biennio vitam cum morte commutarunt clarissimi duo Scholæ nostræ Doctores,
Renatus Moreau, 17. Oct. 1656. et Ioan. Riolanus, Anatomicorum prin-
ceps, 19. Febr. 1657. Ego vivo et valeo annos natus 57. et ut Professor regius
publicè doceo Medicinam in Auditorio regio, eámq. Hipp. et Galeni, absque ullo
studio novitatis Anatomicæ, Pharmaceuticæ nec Chymicæ. Chymistarum
formulas tanquam aucupia crumenarum, imò Chymistas, tanquam man-
cipia impuri Paracelsi, odio prosequor plusquam Vatiniano : stibio et
chalcantho, istorum tenebrionum idólis numquam utor : mihi enim sufficiunt ad
bene mendendum vulgaria nostra remedia, cassia, sena, rheum, syrupi duo
purgantes ex rosis solutivus, et de florib. mali persicæ, cum aliquot
compositionibus scammoniatis, quales sunt diaprunum solut. diaphenicum,
diacarthami, de citro, diapsyllium et de succo rosarum : nec est ullus
morbus natura sua curabilis, qui vulgarib. istis non cedat, modò adsit legi-
tima et exquisita venæ sectio victus ratio, et præcesserit venæ sectio toties repetita,
quoties postulabit morbi magnitudo et virium robur. Quod ad illam
venæ sectionem pertinet, eam hîc celebramus et usurpamus longè frequen-
tiùs atq. audentiùs quàm in Italia : sunt enim cives nostri temperati
et intemperati, et intemperantes, sanguinei, biliosi, plethorici, carnibus
et vino addicti, crapulæ ministri, cibis utentes quoi plurimum nutriunt ;
et vivimus in regione Septentrionali, Borea vento perflati, corporis
nostri meatus occludente, et omnem evaporationem ac insensilem transpi-
rationem impediente : inde frequens et semper plusquam non ubique pletho-
rica constitutio, etiam in pueris et senibus, per quam cogàmur ad sangu. missionem recurrere
tanquam ad summum præsidium, singulare Artis nostræ Palladium, et
quod semper nobis succedit, arte et methodo præscriptum ; de cujus
præsidij necessitate et dignitate plura scripserunt Galenus ubique,
et ex professo in trib. libris de cur. ratione per sang. miss. Fernelius
noster lib. 2. Meth. med. integro, et Leonardus Botallus, lib. proprio :
quem si non habeas Tibi mittam, ut et quodcumq. optaveris ex hisce
regionibus nostris. Doctiss. ille vir Sanctorius à Sanct. qui olim
apud vos vixit, et Methodum scripsit vitandorum abusum ac errorum in
Medicina, ac plures alios tractatus edidit, filiósne reliquit ομοτεκνους ?
indica etiam quo anno obierit ?
Quid est illud medicamentum quod Venetijs
vænum exponitur, et à Turcis emitur, quod vulgò Maslac et Amfiam
nuncupatur ? quid differt ab Opio nostro vulgari, quod non est
verum Opium veterum, sed dumtaxat Meconium : Opium enim veterum
et Dioscoridis, erat candidum, nostrum est subnigrum, sed omni viro bono,
et in arte nostra sapienti semper suspectum. Estne frequens apud
vos aloes usus ? sanè hîc penè nullus est, propter immodicam caliditatem
et siccitatem, quæ hydropem accersit, et ac hæmorrhoïdes provocat.
