Ms BIU Santé no 2007, fo 100 vo.
vino, et nulla forsan ceverisia, vel saltem pauciore : fructus,
helvellas et oluscula comedat, ut et acetaria ex lactuca, portulaca,
cucumere, cichorio, pro ratione tempestatis : paucum sanguinem ista generant,
et parum nutriunt : inter fructus potissimum colloco poma, pyra,
cerasorum omne genus, castaneas, fragas et uvas maturas.
Sed ut tutius ac citius occurratur isti plenitudini, summum
ac princeps remedium est adhibendum, nempe venæ sectio celebranda,
quamprimùm ex utraque basilica ; post octo dies erit illi repur-
gandum corpus ex folijs Orient. cassia et syrupo diarhodon :
sed bis erit repetenda isthæc purgatio, interjectis inter utrumq.
dosim aliquot diebus : ea tamen lege et conditione, ut iterum ineunte
Majo, patiatur, imò curet sibi detrahi sanguinem ex utraque
basilica. Remedium istud princeps, ac verè ηγεμονικον dolores
ejus sedabit, omnem fluxionem sistet, et ad legitimam temperiem
Dominam vestram reducet. Mensibus æstivis summoperè illi conveniet
balneum, vel semicupium ex aqua tepida, in quo posita hauriet
potus quosdam refrigerantes, vel serum lactis, cum syrupo violato,
vel de prunis simplici. Spadanis aquis facile carebit, imò debet
carere, propter metallicam quandam qualitatem attenuantem,
et spiritus chalchantinos ejus visceribus inimicos : apud me enim
certum est ejusmodi aquas medicatas longè plus habere salu- cele-
britatis quàm salubritatis : et certè plurimum debent tales
aquæ suorum præconum mendacijs, et varijs artib. quibus utuntur
isti ut ægros multos ad se pelliciant. Habetis in civitate vestra
Bruxellensi, virum optimum et peritissimum Medicum, D. Rob.
de Farvaque : si à vobis de singulis consulatur, saluberrima
consilia vobis suggeret. Proximo Septembri erit iterum vestræ
Dominæ secanda utraque basilica ; et Octobri mensib. sequentib. usque ad
hyemem erit illi ter aut quater repurgandum corpus, eodem ipso
medicamento quod suprà commemorato. Datum Parisijs, die Mercurij,
9. Martij, 1661. Si quid supersit dubij, vel hæreat aliquis
scrupulus, scribite, et veritas vos liberabit. Vester ex animo
Guido Patin, Doctor Med. Paris. et Professor regius rei
Anatomicæ, Botanicæ, atque Pharmaciæ.
