Ms BIU Santé no 2007, fo 179 vo.
D. Volcamer Norib. vivit et valet, nuper ad me scripsit : ejus in me amori ac
humanitati plurimum debeo : est vir optimus ac officiosissimus : fidelis amicus
medicamentum vitæ. Nuper quoque scripsit ad me D. Bauhinus : tres ejus filios olim
habui auditores meos : et ille ipse ante annos 40. fuit mihi notitissimus, et ex illo
tempore amicus fuit constans et fidelis : ejus filiorum duorum Metamorphosin ridi-
culam vidi et risi : sed quis non rideret in tam fatuo sæculo nisi sit Heraclitus ?
Heroes vestros literarios, et Germaniæ vestræ Phænices, Rolfinkium, Conringium
et Meibomium, eruditissimum juvenem Dij servent in multos annos. Duos illos
Senones, Prof Leidenses, Vorstium et Lindenum, amicos meos, seriò luxi, et adhuc
lugeo : ô utinam uterque superstes viveret ! sed tantis fatum conatibus obstat :
prior ille senex obijt, ex mærore demortuæ filiæ nubilis : alter v. decumbens ex
catarrho in pulmones neglecta venæ sectione, (tantopere commendata à Galeno, quem
ille oderat, nec intelligebat, licet ei sæpius malediceret summo suo immerito,) usus
enetico medicamento chymico, seipsum infeliciter necavit sexto morbi die, cum febre
assidua : quod numquam fecisset si Galenum intellexisset. Vidi quæ singula
edidit Ionstonus, nec quidquam cupio : habeo Arboretum Biblicum Ursini ;
sed de Ursini, Prof. Botanici Lipsiensis obitu seriò doleo : pollicitus enim fuerat
se missurum ad me varias Disputationes suæ Academiæ, quas eo demortuo,
frustra expectarem ab alio, quem non novi : sed hoc est fatum meum, ut amici
mei moriantur, nulli v. inimici, quippe quos nullos novi. Sam. Bocharti librum
de Animalib. sacræ Scripturæ hîc habui primus : operam enim dedebam ut ad umbili-
cum deducta editione, statim ad me deferetur : dictum factum : eruditum ipsum
Autorem apprime novi ante annos 20. Hîc habemus D. du Clos, Metensem
Medicum, qui mihi retulit se habere fasciculum tuum, à Te mihi destinatum :
daturus est operam ut proximo mense ad nos devehatur, nec à publicanis inter-
cipiatur. Hîc habentur preces publicæ per totam Urbem pro juniore nostra Regina
quæ vexata febre assidua passa est abortum, et peperit puellulam, quæ
tamen vivit : sed quamdiu nescitur. Utinam Lotichius vester idoneum apud vos
haberet Typographum ad novam editionem sui Petronij. Eruditum illum
juvenem Danum, Sim. Paulli filium, crede mihi, carissimum et commendatissimum
habebo. Vale, vir cl. et me ama. Parisijs, 28. Nov. 1664.
