Oculos motu uoluntario mouendos. QVONIAM neque ex lateribus, neque ex posterioribus, neque superioribus, uel inferioribus sedibus neque omnino aliter, quam secundum pupillæ rectitudinem, oculorum uisio perficitur : paucissima utique uideremus, si oculi immobiles penitus essent. Qua de causa ipsos ita corporis nostri Conditor creauit, ut plurimum circumduci possint, et præter hoc, collum ad motus promptum reddidit, ideoque potissimum duo facti sunt oculi, etiam notabili spacio dissiti. Cæterum si eos moueri motu uoluntario oportebat, ipsis quoque musculos largiri necessum fuit.Oculorum motus. Sed quum oculorum motus sint tres, unus, quo hi intro, uersus nasum adducuntur, et quo extrorsum ad paruum angulum aguntur : secundus, quando sursum tenduntur, uersus supercilia, et deorsum trahuntur uersus malas : tertius, quo obscuro admodum motu circumuertuntur, merito totidem numero duces motuum, musculos fabrefieri oportuit, atque singulis motibus, qui in geminos diuidi possent, binos musculos aptari necessum fuit.Musculi sex primi. At ex his duos quidem in lateribus, singulos scilicet ad utrunque angulum, alios autem duos, unum quidem infra, alterum uero supra, quintum uero ac sextum, ut circumuersionis motui præessent, uarie locari oportuit. Cæterum ex his sex numero musculis primi quatuor, quemadmodum rectis oculi motibus præsunt, ita quoque rectum situm obtinent, et omnes omni ex parte sibi similes sunt. Capita enim ipsorum, uelut ex dura cerebri membrana neruum uisorium obtegente, et e neruo secundi paris neruorum cerebri, statim in nerui uisorij a caluaria elapsu, originem ducunt. Deinde ipsorum uenter amplior, quam profundior, attamen teres propemodum uisitur, et posteriori oculi regioni, neruoque uisorio, secundum ipsius a caluaria in oculi usque radicem ductus longitudinem, incumbit, et quum propter mediam oculi sedem (ubi is latissimus est) uenter pertigerit, in latam membraneamque eneruationem finit. Quæ ultra mediam oculi sedem terminatur, et duræ oculi tunicæ, tanquam in mouendo osse, recta (sed secundum corporis latitudinem ducta) linea inseritur, iuxta iridem, maiorem'ue oculi circulum, in anteriori oculi parte conspicuum, et nigrum ab albo (ut ita loquar) dirimentem. Porro musculi, circunductionis oculi opifices, forma quidem ac ortu prioribus illis respondent, at minores sunt, et ductu insertioneque ab illis uariant. Prior nanque a dura cerebri membrana, uisorium neruum ambiente, e regione minoris anguli originem ducit, et in humiliorem oculi sedem, neruosa sua tenuitate inseritur, obliqua linea iuxta iridem, reliquorum quatuor modo. Alter uero a uisorij nerui membrana, e regione maioris anguli enascitur, et duræ oculi tunicæ, neruosam ipsius tenuitatem, obliquiori linea, ad superiorem oculi sedem inserit. Atque hinc fit sex istos oculi musculos solo situ, et in duram oculi tunicam insertione, idque adhuc modice, uariare. Primi enim quatuor, uti modo dicebam, prorsus recti sunt, rectaque linea inseruntur, alij duo obliquiores uisuntur, obliqua linea insertionem molientes, qui etiam si circumuersioni conducant, attamen et sursum deorsumque oculum agunt. Atque omnium neruosarum tenuitatum ductus, inter duram oculi tunicam, et adhærentem medius consistit. Efformant itaque simul omnes musculi, dum proprium adhuc situm seruant, turbinatam figuram, cuius conus ipsorum est exortus, basis uero, eorundem insertio.Adeps musculis oculorum interpositus. Breuissimo enim ductu neruo connectuntur uisorio, quum in illorum, quam una conformant capacitate, multus contineatur adeps duriusculus, et albus admodum, atque is rursus alteri cuidam obuoluitur musculo.Septimus oculi musculus. Est enim præter commemoratos sex oculi musculos, alius musculus grandis, undecunque ab illis et eo, quem diximus, adipe circundatus, ac solus similem figuram, quam priores sex simul efformabant, constituens. Nam musculus iste principium quoque a dura membrana, neruum uisorium inuoluente assumit, at paulo anterius, quam sex priores : illorum enim origo ab oculi corpore remotior est, quam eius,