| β,γ | Communis nenæ[6] iuxta radij humiliorem partem, qua brachiale respicit, diuisio, y aut Y aut γ non absimilis : cuius quidem alterum crus y insignitum, externam summæ manus sedem pollici ac indici subiectam, ipsumque pollicem et indicem accedit, et ramulum δ indicatum in internam manus sedem digerit. Alterum autem crus ε insignitum, uersus medium et anularem potissimum absumitur. Ramis externam summæ manus sedem adeuntibus uaria a nostris medicis imponuntur nomina, quæ quum inter se admodum pugnent, et passim sint obuia, aliquid de ipsis iam dicendum arbitror : hunc characterum indicem lubentius barbaris nominibus occupaturus, quam orationis qua has uenas describam seriem. Græci igitur et Latiniores medici in uniuersa manu paucas uenas proprijs nominibus appellarunt. Venam nanque per brachij interiora alamque excurrentem in utroque brachio, quia axillam seu alam perreptat, axillarem uocauerunt : quemadmodum et cubiti interiorem, quod scilicet per cubiti interiora potissimum exporrigatur. Verum priuatim dextræ manus axillarem iecorariam uocarunt, quod in iecoris affectibus illam diuidere soleant. Sinistræ autem manus axillaris lienaria ipsis dicitur, quod in lienis morbis hanc plerunque aperiant. Sic rursus seu humeralis a insignita, simpliciter suum nomen obtinuit, quod per humerum in manum feratur : etiam cubiti exterior nuncupata, quoniam cubiti exterius latus perreptat. Hippocrates in libris hanc uidetur crassam uenam nuncupasse. Quia uero capitis morbis hæc mederi creditur, etiam capitis uena est dicta. Ramos vero h et t notatos et uenam communem, quam α notauimus constituentes, medias uenas nuncuparunt, quod scilicet ad flexus cubiti medium ducerentur, aut quod inter cubiti exteriorem uenam et interiorem essent mediæ. Ab obliquo autem ipsorum ductu obliquas quoque illas uocarunt. Communem (quæ α insignitur)nuncuparunt, quæ ab illis ramis h et t notatis consurgit, atque interiori et exteriori cubiti uenis communis est. Præter hæc nomina uix alia apud illos reperias. At si Arabum libros uerses, nominum acerui passim occurrent eidem uenæ uix unquam accommodatorum. Quo autem aliquid certius de his quoque depromam, studiosorum nomine qui me his nominibus in Anatome remorari solent, non grauabor Auicennæ interpretis nomina hic recensere, quæ prima libri primi doctrina quinta Capite quarto leguntur. In quo Capite Avicenna ex proposito manus uenas describit, earum seriem a Galeni libro tertio aut potius ab Oribasio petens. Avicenna igitur, aut ipsius interpres, Spatularem uocat humerariæ partem a iugulari externa ad eam usque sedem ductam, qua humeraria brachij cutem primum subit, quæ pars duobus a in nostra delineatione complectitur. Qua autem humeralis brachio exporrigitur, illam Cephalicam quasi capitis uenaminferius a et f continetur. Tertium humerariæ ramum, quem i insigniuimus, Funem brachij appelat. Axillaris ipsi Asellaris dicitur. Communis uero α notata, Nigra : ubi autem hæc oblique ad radium contendit, Basilica ipsi uocatur. |
272 [372]