Λ Λ | Quartum maxillæ superioris os. Λ in oculi sede positum huius ossis partem notat, quæ inferiorem oculi sedis regionem magna ex parte constituit. Dein eodem etiam Λ indicatur principium foraminis, quod in genis B insignitur. Verum id os circumscribitur h, g, e, Y, X, c, d, b, D, a, N, in prima hac figura positis, et insuper e, u, t, et y in sequenti figura ponendis |
Ξ | Quintum maxillæ superioris os. Vnum Ξ dextri lateris os, alterum Ξ sinistri lateris os insinuat, quod et in alijs characteribus obseruatum uides. |
Π | In altera secunda'ue huius capitis figura Π se offert, sextum superioris maxillæ os indicaturum. quo etiam charactere sexti ossis coniux notabitur, ipsum uidelicet alterius lateris sextum os. |
O | Narium septum, quod octaui capitis ossis cribri modo perforati processus putatur. Atque his iam explicatis characteribus, ossa præsenti figura occurrentia insigniuimus. |
P | Sutura duos ossium processus committens, quibus iugale os efformatur. |
Q | A Q ad S sutura notatur, cuneiforme os a primo maxillæ superioris osse dirimens, ac hic in oculi sede conspicua, in dextrique oculi sede ad characterem Q clarius fere, quam in sinistri, apparens. In tertia uero figura, et quarta, quæ sexto Capiti præponuntur, hæc sutura in cauis temporum d insignitur. |
R, S, T, V, X, Y et Z | Sutura frontis os a maxilla superiori et cuneiformi diuidens. Ab R enim ad S suturæ pars notatur, frontis ossi et primo maxillæ ossi communis, quæ in cauis temporum in tertia figura sexti Capitis conspicitur, inibi a b ad proximum ipsi b pertinens. Hic uero ab S ad T suturæ huius interuallum notatur, frontis ossi et cuneiformi commune. A T ad V interuallum metitur, tertio maxillæ ossi et frontis ossi commune. Ab V ad X interuallum præsentis suturæ insignitur, commune frontis ossi et secundo maxilla ossi. Inter X et Y huius suturæ interuallum consistit, quarto maxillæ ossi ac frontis ossi commune. Ab Y uero ad Z suturæ illius significatur interuallum, commune frontis ossi, et quinto maxillæ ossi. |
a | Maxillæ sedes aspera inæqualisque, qua primum maxillæ os quarto committitur. Verum ab a ad b sutura indicatur, duobus illis ossibus communis, ubi hæc in anteriori caluariæ sede est conspicua. Pars autem ipsius quæ in temporis cauo latitat, ex quarta figura sexto Capiti præposita, sub charactere f in temporis cauo posito peropportune petes. |
b | A b ad Q suturæ primum os a quarto diuidentis pars indicatur, quæ in oculi sede est conspicua. Hæc in præsentis figuræ sinistra oculi sede characteribus paucioribus occupata, est manifestior. |
c | Ab V ad c sutura notatur, secundo ossi et tertio communis. Quicquid autem sursum iuxta C et Δ ad X usque ducitur, secundum os a quarto dirimit. |
d | d seruit describendo tertio maxillæ ossi. T enim ad V superiorem eius ossis sedem describit, V ad c anteriorem, T ad d posteriorem, qua cuneiformi committitur ossi. c uero ad d eius ossis inferiorem partem circumscribit, quarto maxillæ ossi contiguam. |
e | e ad Y suturam notat, quarto maxillæ ossi et quinto communem. |
f | f ad Z suturam insinuat, quinto unius lateris ossi et quinto alterius lateris ossi communem. |
g | In narium amplitudine g ponitur, suturam indicans, qua septum narium a quartis maxillæ superioris ossibus disiungitur. |
h | Sutura, aut harmonia potius, quartis maxillæ superioris ossibus communis, cuius beneficio illa inuicem in mustacis regione dirimuntur. |
i | Ad superiorem foraminis B notati sedem, i ponitur, indicaturum quarti ossis suturam, quæ elatius quam id foramen consistit, ipsique quarto ossi duntaxat peculiaris est. |
Hominis caluariæ, cuius modo indicem prosequor, figura, nullo præterea insignitur charactere, neque aliud in illa enarrandum superest. Subsequentes itaque notæ canis caluariæ hunc in modum propriæ censebuntur.