| D 1, 2 | Præsens foramen omnium quæ in oculi sede conspiciuntur, facile maximum occurrit, et dictæ iam sæpius minoris tertij paris neruorum cerebri radicis ramulo uiam dat, in temporalem musculum et mansorium ex oculorum sede porrecto. Neque huius duntaxat neruuli nomine patens illud oblongumque foramen exculptum est, at musculi temporalis exortui hinc quoque robur accedit. Ad hæc pituitæ, ad grandius in narium cauitatem pertinens foramen (quod Ф expressimus) defluenti, uiam præbet. Quinetiam præparatum uidetur neruulo cuidam, quem iuxta quinti paris neruorum cerebri radicem educi, nos primum obseruauimus. Quippe neruulus ille per proprium foramen paulo posterius H notandum porrigitur in temporalem musculum et mansorium, illumque qui in ore delitescens, etiam attollendæ maxillæ famulatur. Cæterum rima hæc, seu oblongum foramen D insignitum, ad cuneiforme os, et quartum os maxillæ superioris pertinet. |
| E 1, 3 | E in tertia figura posito, et E in utrisque oculorum sedibus primæ figuræ foramen indicatur, in sedis oculi radice seu uertice elatissimum, et in cuneiformi osse incisum, quod foris qua oculi sedem spectat, prorsus orbiculare cernitur, neruo uisorio (cuius gratia exculptum est) amplitudine respondens. Verum interius ubi cerebro propius accedit, iuxta externum ipsius latus, exiguum eundemque acutum obtinet angulum, qui uenulæ cum uisorio neruo hac excidente paratur. Angulum hunc γ notat. Is nanque inter E et γ in tertia huius Capitis figura consistit. |
| F 3 | Huic sinui cuneiformi ossi inciso, uisoriorum neruorum coitus innititur. |
|
| G 1, 3 | Libro 9 de Vsu partium.[Illustration] Quoniam præsens foramen obscure in huius Capitis figuris cernitur, hic foraminis dextri lateris effigiem delineaui, atque humiliorem ipsius partem δ, superiorem uero seu eiusdem foraminis angulum ε insigniui. Quanquam utriusque lateris foramen etiam pulchre in octaua sexti Capitis figura in conspicuo sit. | G in primæ figuræ sinistra oculi sede occurrit, in tertia autem figura G dextrum eius figuræ latus ideo occupat, quod in sinistro latere foramen G indicatum, nusquam obuium sit, eo quod huius figuræ caluaria in latus uel istius foraminis aliquo modo uidendi nomine, inflexerimus. Insculpitur autem cuneiformi ossi, ac humiliori sui parte paulo minus toto orbiculare est, elatiori uero in acutum longumque et angustum desinit angulum. Foramen hoc, etiamsi Galeno secus uisum sit, nerui uisorij foramen amplitudine uincit ; etsi similiter atque illud prorsus orbiculare esset, facile triplo, aut quadruplo amplius efficeretur. Nihilominus tamen humilior ipsius pars, quam paulo minus toto orbicularem esse diximus ) uisorij nerui foraminis amplitudinem adhuc longe superat. Præsens foramen cælatur gratia secundi paris neruorum cerebri, in oculi sedem ad mouendos oculi musculos progredientis, dein gratia minoris tertij paris neruorum cerebri radicis, quæ frontis cuti, superioris maxillæ in facie musculis, in nares et musculos inferiorem maxillam attollentes, digeritur. Hæc quidem per humiliorem foraminis sedem procidunt, una cum insigni ramo soporalis arteriæ, quam reticularem plexum in homine quidam efformare comminiscuntur. Verum per elatiorem foraminis sedem, quæ in angustum longumque angulum cogitur, uena ex oculorum sede, ab illis quæ temporalem adeunt musculum, duræ membranæ hic distribuitur, et suæ distributioni in caluariæ basi sinus inibi exculptos gerit, uenularum tuberibus congruentes, et in ea caluariæ sede conspicuos, cui in tertia figura ζ inscribitur. Neque profecto neruis his duntaxat, et uenæ, et nuper dictæ insigni arteriæ, amplum id foramen excauatur : uerum etiam pituitæ ex cerebro in oculi sedem, et hinc in narium amplitudinem promananti, quemadmodum sectio luculentissime iuxta ac iucundissime ostendit, adeo ut nulla ratione magna hæc foraminis amplitudo, neruis illis, et uenæ, et arteriæ par conspiciatur |
| | H 1, 3 | Foramen orbiculare, et in osse longius quam duo proxime commemorata procedens, et arctius quoque. Hoc in cuneiformi osse cum reliquis neruuli gratia exculpitur, quem non procul a præcipua quinti paris radice pronasci audies. Præsens foramen in tertiæ figuræ dextro latere sub G positum, paulo grandius uisitur foramine in sinistro latere conspicuo, quod interdum præter neruulum illum etiam tertij paris minorem radicem transmittat, quam per foramen G insignitum deduci, paulo superius commemoratum est. |
| I 3 | Hac sede in octauo capitis osse multa, sed exigua spectantur foramina, odorum et æris in inspirationibus ad cerebrum ingressus nomine, incisa. Hæc non ut hactenus dicta, ipso ductu recta sunt, et utrinque peruia, sed obliqua, et anfractuosa, spongiarumque foraminibus similia. Inter reliqua tamen utrinque unum est rectum et grande satis, quod primum quodammodo est, et anticæ frontis ossis sedi proximum, uenam ad duram cerebri membranam ex narium amplitudine exporrectam transmittens. Verum cætera interim foramina, etiam recta et utrinque pertusa uiderentur, si modo interiora narium ossicula in ipsorum summo non pari semper numero reposita, et insigniter fungosa, et nonnihil membranea cartilagineaque eximerentur. |
50