tuit dorsum, quamuis id ad stabilitatem et tutam dorsalis medullæ sedem satius fuisset : quum neque luxari, neque excidere aut distorqueri posset, nisi ita uarie esset articulatum. Verum si rerum Opifex tantum patiendi pertinaciæ animum adhibuisset, neque in organorum fabrica ullum priorem digniorem'ue spectasset scopum, non aliter sane quam prorsus incompositum simplexque dorsum creasset. Quippe si quis lapideum, aut ligneum animal confingit, non aliter dorsum quam unica continuaque parte fabricat. Homini uero dorsum inclinaturo, aut erecturo, non erat melius id uniuersum unico osse fabrefieri ; quinimo cum dorsi beneficio hominem multis ac uarijs motibus agi oporteat, satius fuit hoc ex pluribus constitui ossibus, utcunque etiam hoc nomine iniurijs magis redditur obnoxium.Dorsi ossium multitudinis causa. Quamobrem uero dorsum non ex duobus uel tribus ossibus, tam longis quam in manu est humerus, et ulna cum radio : in crure autem femur, et tibiæ os cum fibula : sed ex quatuor et triginta efformetur ossibus, uarie mutuo articulatis, in præsenti subijciendum est, a præcipua totius dorsi particula sumpto orationis exordio. Est autem hæc dorsalis medulla, quam instar cerebri partibus sub capite locatis esse tunc nitemur ostendere, quum quarto libro neruorum seriem pertractabimus. Quoniam itaque hanc similiter ut cerebrum, duro et prompte iniurias repellente munimento custodiri oportebat, dorsum instar carinæ humano corpori subiectum, omnino insculpi, iterque simul et tutissimum uallum ac (ut Græci dicunt) συρίγξ ἱερά, ipsi medullæ confici debuit. Huius enim natura cerebro respondet, et noxæ quæ hac affecta hominem afficiunt, illis conferuntur, quæ cerebro laborante indies oboriri cernimus. Motus siquidem et sensus omnium partium quæ læsæ subsunt uertebræ, uitiantur.Libro 12 de Vsu partium. Sed hæc quidem neminem latere, Galenus attestatur. Quamobrem uero diuinus Hippocrates libro de Articulis prodiderit, Si plures uertebræ uno ordine inuicem subsequentes transmoueantur, graue esse : si autem una ex cæterarum compage exiliat, perniciosum esse : haudquaquam perinde notum est omnibus. Hippocrates itaque causam symptomatis nos edocet. nam si simul plures uertebræ dimoueantur, ita ut quæque paululum transmutetur, et sua sede declinet, tunc circularis, ac proinde non uehemens dorsalis medullæ obtinget euersio. Si uero, inquit, una uertebrarum suo contextu dimoueatur, tunc dorsalis medulla paruo interuallo inflexa, afficietur, et quæ exilijt uertebra ipsam comprimet, nisi sane et rumpat. Quum itaque dorsalis medulla angularem, eamque subitam et acutam flexionem nequeat perferre, dorsum non potuit magnis et laxis articulis insignem transpositionem habentibus, innoxie moueri.Dorsi ossium non par magnitudo, neque dorsalis uiæ æqua amplitudo. Vnde etiam melius fuit, ex multis et paruis ossibus quæ singula ad motum conferunt, dorsum coaceruari. Cæterum his ossibus non par adest magnitudo, neque omnibus foramen medullam dorsalem transmittens æqua amplitudine exculpitur. Coordinationis enim occasione melius fuit, minores semper fieri superiores : modo id quod portatur ab aliquo, minus esse conueniat portante. Hinc igitur maximum dorsi ossium sacrum os a Natura creatum est, et ueluti basis quædam uiginti quatuor uertebris subijcitur, duobus commissum maximis ossibus, quæ una cum ipso corpus maxime stabiliunt. Secundum uero dorsi os magnitudine, si a sacro sursum ascendas, uertebra est sacro ossi coarticulata, a prima quidem iacens quarta et vigesima, ipsarumque in lumbis uertebrarum ordine quinta. Porro aliarum singulæ quantum positu ab infima discedunt, tantum et mole. Atque hæc magnitudinis diminutio usque ad ipsum caput perficitur, præterquam si quando uertebra interueniat paulo maior subiecta ; quod sane non absque magno usu fieri, primæ ceruicis uertebræ descriptio ostendet, quæ illam reliquis ceruicis uertebris latiorem esse docebit, gratia commodæ quinti et sexti caput mouentium musculorum insertionis, et secundi scapulum attollentis musculi exortus. Atque inibi etiam articulationis nomine, secundam ceruicis uertebram ualidiorem grandioremque tertia esse audies. Quia uero Natura nullius occasione uertebras in posteriori suorum corporum sede exculpsit, quam ut iter dorsali medullæ pararet, oportuit sane foramen magnitudine cum dorsali medulla congruere. Hæc autem quum in singulis uertebris sit impar, et in primis uertebris maxima (gignendis enim neruis sensim constringitur, attenuaturque) optimo iure superiorum uertebrarum foramen inferiorum foramine amplius est. Dein quum superiores uertebræ amplo foramine exculpi debuerint, et interim alijs innitantur uertebris, prompte colligitur, illas quoque simul tenues necessario extructas esse.Foramina neruis emittendis parata. Neque dorsali medullæ duntaxat uia in uertebris exculpitur, uerum etiam triginta neruorum paribus in homine a dorsali principium ducentibus tutissimæ uiæ foraminaque in uertebris cælantur, quæ in neruorum serie exequar, quamuis in priuatis uertebrarum descriptionibus quædam illorum foraminum mentio subinde incidet : præcipue quod in omnibus uertebris non eadem specie, neque pari etiam numero insinuentur.Vertebrarum spina. Quum igitur dorsalis medulla ueluti alterum cerebrum omnibus propemodum quæ sub capite consistunt organis habeatur, et dorsum ipsi uia et uallum quoque tutum fabricetur, rerum Opifex alia permulta mi