Prima præsentis Capitis figura, occipitij ossis partem ab alijs ossibus liberam, et in externa caluariæ basis sede hic conspicuam exprimit.
Secunda, primam ceruicis uertebram anteriori superiorique facie expressam proponit.
Tertia, primæ ceruicis uertebræ superiorem posterioremque imaginem oculis subijcit.
Quarta, primam ceruicis uertebram inferiori posteriorique facie delineatam exhibet.
Quinta, secundæ ceruicis uertebræ anteriorem commonstrat faciem.
Sexta, secundæ ceruicis uertebræ posteriorem faciem designat.
Septima, secundam ceruicis uertebram inferiori facie spectandam offert.
Octaua, tertiæ ceruicis uertebræ anteriorem superioremque faciem ostendit.
Nona, tertiæ ceruicis uertebræ posterior superiorque facies delineatur. Quoniam uero huius ceruicis uertebræ inferior sedes secundæ uertebræ inferiori sedi respondet, illam hic non apponimus, ne forte præsenti Capiti nimius tabularum aceruus præponatur. Atque hac etiam ratione, cæteras ceruicis uertebras tertiæ subiectas singulatim non depinximus, præcipue quum illarum descriptio ex trium superiorum uertebrarum figuris, prompte desumi queat.
Decima, trium primarum ceruicis uertebrarum compago, anteriori parte depicta cernitur. Vndecima, trium primarum ceruicis uertebrarum contextus posteriori facie exprimitur.
A in 1 | Foramen in occipitis osse, dorsalis medullæ gratia excisum. |
B 1 | Dextrum occipitis ossis capitulum, quod primæ coarticulatur ceruicis uertebræ. |
C, D, E, F 1 | Sinistrum uero capitulum, C, D, E et F insignitur. Siquidem C et D capituli notant longitudinem, seu ductum, quo longitudinem in horum capitulorum descriptione metimur. Dein E insinuat internum latus capituli, quod magis deorsum, quam externum F insignitum, deprimitur, aut non æque sursum prominet |
G 1 | Anterior foraminis dorsalem transmittentis sedes, quæ ob teretis cuiusdam ligamenti insertionem aspera et inæqualis est. |
H 1 | Sinus in posteriori sede utrorumque capitulorum occipitis ossis incisus, ac uiam primo dorsalis medullæ neruorum pari porrigens |
I 2, 3, 4 | Foramen transmittendæ dorsali medullæ in prima ceruicis uertebra exculptum. |
K 2, 3 | Hic primæ uertebræ corpus exculpitur, secundæ uertebræ dentem, qui notabitur, suscepturum |
L 3, 4 | Sinus in posteriori sede corporis primæ uertebræ incisus, ac cartilagine incrustatus. |
M 2, 10 | Processus et tuberculum, in anteriori corporis primæ ceruicis uertebræ sede prominens. |
N 2 ,3 ,10, 11 | Dexter primæ uertebræ sinus, quo dextrum occipitis ossis capitulum excipitur. |
O, P, Q, R | Sinistrum sinum in secunda et decima figuris O, P, Q, R notaui : O quidem et P eius sinus longitudinem indicaturus : Q uero, internum latus, longe ipso exteriori R insignito decliuius. |
S 2, 3, 4, 10 et 11 | Transuersus primæ ceruicis uertebræ processus dexter. Sinistrum uero charactere non insigniuimus, quod utriusque eadem sit ratio. |
T | Sic etiam ipsius foramen in sinistro tantum latere secundæ et undecimæ figuræ T notauimus. |
V 3, 11 | In dextro tantum latere sinus indicatur, qui cum occipitij ossis sinu H notato commune efficit foramen, quo primum dorsalis medullæ neruorum par elabitur. |
X 3, 4, 11 | Hac sede prima ceruicis uertebra posteriori destituitur processu, et inibi duntaxat uisitur acutum exiguumque instar lineæ prominens tuberculum, ad cuius latus hæc sedes aspera est. |
Y 4 | Dexter primæ ceruicis uertebræ sinus, dextrum secundæ uertebræ tuber c signandum excipiens. |
a, b | Sinistrum sinum a et b notauimus : a quidem internum ipsius latus, b autem externum indicantes. |
c 5, 6 | Dextrum secundæ uertebræ tuber, seu insigniter depressum capitulum, commemoratum iam prius primæ uertebræ sinum Y insignitum subingrediens. |
d, e, f | d, e, f, sinistrum ostendunt capitulum. Verum d priuatim latus ipsius notat internum elatiusque ; e uero externum, et depressius ; f autem eam capituli partem, quæ ad posteriora ueluti extra circuli circumferentiam educitur. |
Γ 7, 10, 11 | Secundæ ceruicis uertebræ processus, quem a dentis imagine dentem uocabimus, quique in quinta figura et decima et undecima etiam conspicitur. Verum hunc in septima, decima et undecima Γ insigniuimus. In quinta autem et sexta figura pluribus notatur characteribus priuatim |