plus, et obtuso angulo similis, et perquam durus, ac solidus. Posterior autem processus anterioris formæ quodammodo respondet, sinum subintrans, qui in posteriori illius sede ad elatiorem rotulæ regionem cælatus cernitur ; cum tamen sinus iste anteriori sinu profundior ampliorque multo sit, processus etiam posterior anteriori crassior ampliorque merito euasit, adhuc magis obtusi anguli speciem referens. Processum hunc Athenienses quidem ὠλέκρανον, Dores autem κύβιτον, Hippocrates uero ἀγκῶνα, Galenus porro iam ὠλέκρανον, iam ἀγκῶνα uocauerunt. Quæ uoces magno eorum qui latina legunt incommodo ab interpretibus confunduntur, non hæc solum unica cubiti uoce crebro uertentibus, sed et ulnam, et totam partem inter brachium ac brachiale repositam, et humeri cum ulna ac radio articulum, et internam eiusdem articuli sedem, ipsiusque flexum : quum interim plurimum intersit, quid singulis uocibus ab illo quem uertunt autore, intellectum fuerit. Quamobrem ne rem alioquin plus satis arduam, obscuriorem reddam, id lubens a lectore contenderim, ut perpetuo eadem uoce toto contextu me uti patienter ferat, neque haud scio cuius copiæ gratia, aut obscuri nominis proprij occasione, omnia turbari uelit ; uocentur igitur nobis hi ulnæ processus, ille quidem anterior, hic uero posterior, quem gibberum plerique et gibbum appellarunt : non expendentes inde ipsos humeri tubercula quæ ad rotulæ ipsius latera habentur, et deinde inferiora femoris capita, aliosque nonnullos ossium processus, simpliciter se gibberos nuncupasse. In horum ulnæ processuum medio, qua se inuicem e regione spectant, grandis exculpitur sinus humeri rotulam excipiens, illique omnino respondens. Primum enim instar semicirculi, aut paulo etiam profundius quam semicirculus, cælatur : nostrique C, ac Græcorum ς imagini accedit. unde etiam ab eius characteris forma Græcorum ueteres hunc sinum σιγμοειδῆ appellarunt. Sinus iste non obiter tantum C modo exculpit, uerum ut ad amussim humeri rotulæ responderet, in ipsius medio tubere obtuso amploque protuberat, quod secundum sinus illius longitudinem fertur, et utrinque ad latera ita compromitur sinuaturque, ut funi chordæue quæ ad trochleæ rotulam uoluitur, possit conferri. Quemadmodum enim teres chorda, rotulæ sinui (ut sic dicam) pariter secundum concauum tereti inuoluitur, ita quoque hoc ulnæ sinus tuber sinui rotulæ conuenit. et depressa sinuataque rursus tuberis latera, rotulæ sinus extuberantibus æquantur lateribus. Quod ut fiat exactius, ulnæ sinus internum latus, altius ipso externo cauatur : quod uidelicet internum rotulæ latus, multo procerius externo promineat, extuberetque. Vniuersus hic ulnæ sinus læuis est, et cartilagine incrustatus, et una cum suis processibus rotulæ ita coaptatus, ut si uel minimum quid, aut magis extuberare, aut profundius insculpi, aut ampliari, aut stringi illum finxeris, ilico uniuersam læseris articulationem, in hoc duntaxat affabre constructam, ut eius beneficio cubitus flectatur, et extendatur, citra luxationis periculum. ad quod non solum spectatu iucundissimus ille qui mutuo ingressu perficitur ossium contextus opitulatur, uerum etiam ligamentorum articulum stringentium robur. Vt enim ualida articulum ambirent ligamenta, processuum sedes sinum non respiciens, aspera inæqualisque est. Quanquam denuo non ligamentorum tantum, sed et musculorum nomine processus asperi cernantur. Posterior enim posterioris processus sedes admodum inæqualiter protuberat, quodammodoque sinuata conspicitur, ut cubitum extendentium musculorum insertionem fortius exciperet. Ita et anterior prioris cubiti processus pars, in hoc aspera est, ut ualidior musculi cubitum flectentium posterioris insertio efficeretur, et musculi secundos ac tertios digitorum articulos flectentes, hinc promptius originem ducerent. Neque solum hæc anterior prioris processus regio exasperatur, uerum et iuxta eius processus radicem eorum musculorum nomine asperis quibusdam tuberculis Natura ulnam decorauit. Ad hæc, ut ualidioribus ligamentis hic articulus amplexaretur, in infima ulnæ sinus C literam referentis sede, utrinque ad latera sinulus instar anguli cuiusdam imprimi cernitur, et ipse sinus C similis a sua circumferentia inibi desinit, asperque redditur. non alia sane occasione, quam ut ex hac ulnæ parte foraminulis non peruijs obsita, ligamentorum fortium penderet exortus.Radij ad humerum articulatio. Atque in hunc modum ulna humero articulatur, radius autem qua humero iungitur, utcunque tenuis est, et ex oblonga tenuique ceruice in amplum orbiculatumque porrigitur capitulum, quod ea parte, qua humerum spectat, sinum exigit rotundum, et non ampliter cauum, quem humeri caput subintrat. Ad hoc caput radius in pronum supinumque agitur, et interim quo minus cubitus flectatur, extendaturque radij cum humero articulus, nequaquam obstat, quinimo radij sinus ad id humeri caput quoque inflectitur et extenditur, ad quod præcipue iuuat humeri capitis longitudo, amplaque ipsius sedes cartilagine incrustata, quæ nunquam a radij sinu in cubiti motibus abscedit. adeo ut non oscitanter Naturæ prætereundum sit artificium, quæ ita humeri cum radio articulum adaptauit, ut et radius una cum ulna flecti reflectique possit, et is interim eleganter in pronum supinumque quiescente ad humerum ulna, ducatur.