τροχαντῆρα dicunt, perpetuo externum subaudiunt, quem etiam propter amplitudinem et quandam cum nate imaginem γλουτόν uocarunt. Horum processuum idem usus cum reliquis fere ossium processibus est, in hoc enim parantur, ut collis ritu musculorum insertionem probe admittant, alijsque musculis eleganter principij sui sedem præbeant. Interior namque femoris processus, qui modice oblongus, neque admodum inæqualis est, in hoc prominet, ut illi sexti et septimi femur mouentium musculorum tendines inserantur. Ad huius processus radicem in posteriori femoris sede aspera quædam ducitur linea, oblique deorsum in posteriora aliquo usque ducta, et octaui femur mouentis musculi insertioni aptata. Exterior femoris processus, externa sui sede gibbus est : interna autem, qua femoris caput respicit, sinuatus. Hic enim asperum inæqualemque commonstrat sinum, cui nonus et decimus femur mouentes musculi inseruntur. Externa autem sedes, quæ gibba est, in osseis hominibus et ætate prouectis, quatuor impressiones sedesque commonstrat, quatuor musculorum insertionibus excipiendis paratas. Ac prima quidem ampla est, et gibba in posteriori processus sede apparens, cui primus femur mouentium musculus ampla insertione implantatur. Ab huius compressionis radice aspera quædam linea deorsum per femoris posteriora nonnihil oblique deducitur, cui primus ille femur mouens musculus ualidissime etiam inseritur. Secunda compressio exterioris processus in anteriori ipsius consistit latere, magis quam prima inæqualis et aspera, et utcunque sinuata, ac demum secundi femoris motuum autoris musculi serviens insertioni. Tertia ad superiorem processus sedem uisitur, inter primæ et secundæ elatiores consistens sedes. Hæc gibba est, et insertionem tertij femur mouentis musculi excipit. Quarta in apice processus se offert, reliquis tribus longe arctior, et quarti femur mouentis musculi tendinem admittens. Atque horum sane musculorum insertionem exterior processus excipit, ab ipsius uero radice in anteriori externaque ipsius sede musculo principium præbet, qui tibiæ motorum septimus recensebitur.Femoris secundum ipsius longitudinem forma. Quod uero ad reliquam femoris formam spectat, uniuersum femur anteriori ipsius sede, et in lateribus teres et utcunque læue est, undique ab octauo tibiam mouentium musculo circundatum ; cuius gratia anterior femoris sedes iuxta ipsius ceruicis radicem nonnihil ampla est, et aspera, quo ualidius et ampliori principio musculus ille enasceretur. In posteriori autem sede femur in acutum quodammodo fertur, et lineam insigniter protuberantem et asperam inæqualemque ostendit ; quæ a femoris processuum radice aliquo usque ultra medium longitudinis femoris prorepit. Huic lineæ quintus femur mouens musculus pertinaciter inseritur, ipsaque duntaxat ex reliqua femoris amplitudine, ab octauo tibiam mouenti musculo, non circundatur. Porro ad inferiorem huius lineæ sedem, ac iuxta inferiorum femoris capitum radicem, femur amplum depressumque, non autem teres cernitur, quo tutius hac maxima tibiam petens uena cum arteria et neruo feratur ; neque si femur hic gibbum esset, a femore errabunda declinet. Quamuis et femur hic ad suorum inferiorum capitum productionem latescere crassescereque etiam debeat. Cæterum femoris ductus non recto tramite a coxendicis ossis acetabulo deorsum tenditur. Verum femoris ceruix a capite ipsius ualde extrorsum oblique, et quasi transuersim fertur, et hinc femur rursus reliquo ipsius corpore oblique uersus interiora ad genu descendens procedit. Quam sane figuram non obiter Natura excogitauit, est enim laudatissima, quamque Hippocrates in libro de Fracturis in effracto femore sedulo seruandam præcipit. Quandoquidem omnes quibus a prima conformatione femur rectius, quam homini ex usu est, contigit, uari et claudi in genu redduntur. Hoc autem quam non modo ad cursum, sed ad ambulationem, firmamque stationem noxium sit, quotidie uidentes discimus. Atqui si utriusque femoris ceruix non statim a coxendicis articulo, uti diximus, foras porrigeretur, quæ nam sedes internis femur amplexantibus musculis reliqua esset? quæ rursus neruis, uenis, ac arterijs in uniuersum crus distributis? quæ item glandulis horum uasorum propagationi præfectis? Non enim per externas cruris regiones hæc descendere decebat, quum ita omnibus foris occursantibus leui quaque occasione lædenda, exponerentur. Si igitur uenis, arterijs, glandulis, musculis pluris ijsdemque maximis hanc regionem inibi parare oportuit, necessum quoque fuit, ex acetabulo femur foras extrorsum ue abscedere. Porro si quibusdam capitis femoris ceruix minus foras educitur, his statim inguinum sedes angustæ et inuicem compressæ redduntur, præterea his femur simul cum genu turpiter extrorsum abducitur. Merito itaque uniuersa femoris forma curua gibbaque exteriori regione existit, interiori uero subcaua. Pariter quoque, et magis adhuc femoris posterior pars sima cauaque uisitur, anterior autem gibba, quod ad sessiones is femoris ductus admodum sit idoneus : uti etiam ad multa quæ sedentes obimus munia, quando scilicet unum femur alteri inijcimus. Vt modo taceam, quam eleganter femur musculis cedit, posteriorem ipsius sedem occupantibus.