[Illustration]
HAC figura nudam depinximus glandem, qua cerebri pituita excipitur, una cum pelui seu infundibulo pituitam huc deferente, et hic flaccido propendente. A lateribus uero arteriarum soporalium portiones, quæ reticularem plexum efformare dicuntur, ita hic expressimus, uti nobis inter secandum occurrere. Atque ut eæ arteriarum portiones uarie se secautibus[2]offerunt, ita quoque uarie eas delineauimus.
| A | Glans, cerebri pituitam excipiens. |
| B | Peluis, seu infundibulum cerebri pituitam super modo dictam glandem deferens. |
| C,C | Arteriarum portio, quæ secundum suorum in osse caluariæ foraminum ductum oblique feruntur. |
| D | Sinistræ arteriæ ramus in duræ membranæ sinistrum latus excurrens. |
| E | Arteriæ sinistræ portio per proprium foramen ad narium usque amplitudinem pertingens. |
| F,F | Hac sede diuersam arteriæ seriem delineauimus. ac dextrum quidem F arteriam notat ea serie ductam ut hic non dirimatur : quemadmodum sinistrum F arteriam hanc in duos ramos, qui mox in unum rursus coeunt, insinuat. |
| G | Arteriarum portiones duram cerebri membranam perreptantes, ac partim in cerebri uentriculos, partim in tenuem membranam cerebri basi obductam digesti. |
| H | Propago arteriæ per foramen secundi paris neruorum cerebri caluariam excidens, ac neruum uisorium, ac dein oculum petens. |
[Illustration]
HAC figura plexum finximus, cuiusmodi is esse deberet, qui Galeni in libris de Vsu partium descriptionibus conueniret.
| A,B | Significet itaque hic A et B arterias caluariam subeuntes, moxque in mirabilem illum plexum diffusas. |
| C,D | C uero et D ramos in quos plexus illius propagines colliguntur, quique illis prorsus arteriarum magnitudine respondent, quas A et B indicauimus. |
| E | Cæterum E glandem notat, pituitam cerebri excipientem. |
[Illustration]
PRÆSENTI figura arteriarum sub dura cerebri membrana consistentium, ac ad glandis cerebri pituitam admittentis latus reptantium seriem depinximus, quam in ouium ac bonum[3]capitibus obseruamus. Atque hanc proponere libuit, ne quis nos latere arbitraretur, quæ illorum animalium hic cum homine sit differentia. Significat autem in hac figura A dictam iam sæpius glandem, B et C arteriarum sedem, qua primum in caluariam ingrediuntur.
[Illustration]
PARVA hac figura erectam finximus peluim, seu cyathum, quo cerebri pituita in glandem ipsi subditum distillat. ac dein hic finximus quatuor ductus a glande pituitam per proxima glandi foramina deferentes.
Indicet igitur A glandem, cui pituita instillatur. B peluim, qua hæc ducitur. C, D, E, F uero, meatus ad faciliorem pituitæ huc decumbentis egressum paratos. Porro præter has septimi libri figuras, ad earum potissimum cognitionem spectantes quæ in caluariæ habentur amplitudine, etiam huc faciunt duæ figuræ mox ad finem primi Capitis libri quarti additæ, et septem parium neruorum cerebri delineationem exprimentes : quas quum illic prolixe indicauerimus, abs re prorsus esset easdem hic quoque reponere, et earum indicem ascribere. Præterea figuræ oculi constructionem exprimentes, etiam si ad septimum referantur librum, tamen Capiti decimoquarto duntaxat illas præponam, quod oculorum fabricæ dedicabitur. Atque id in illis figuris priuatim faciam, quod nulli alteri quam dicto iam Capiti famulentur.
621