QVOD modo damus librorum de Humani corporis fabrica Compendium, in duas partes dissectum est, quarum una sex capitibus complexa, succinctissimam omnium partium historiam complectitur : altera in pluribus tabulis earundem delineationem simul cum characterum quibus insigniuntur indice proponit. Quare tuo ipsius arbitratu nostrum ordinem (quem ex uario ad impressionis formam, compingendique rationem commodissimum selegimus) tanti quanti uisum erit pendens, aut partium decriptionem, aut designationem, notatumque indicem primum aggredieris, quem omnino a figuris nudas uiri mulierisque imagines proponentibus auspicabere, ubi externarum sedium appellationes, ceu illarum imaginum index occurrent. Integram ossium compagem offert figura a uiri tergo impressa : quanquam et figuræ ad uiri illius proportionem delineatæ, ac uelut musculorum tabulæ inscripta etiam sectionis serie ossa proponant et præcipue earum quarta et quinta. Musculorum etenim ligamentorumque delineatio petenda est primum ab illa quam e regione figuræ omnia ossa exprimentis locamus, ob idque prima musculorum figura inscribitur : cui succedit quæ tertia nominatur, dein quarta et quinta. Nutritionis quæ cibo potuque fit organa, et dein cor partesque ipsius munijs subseruientes, simul cum neruorum serie proponuntur figuris nudam mulieris imaginem subsequentibus, ubi et mulierum generationis spectantur instrumenta, perinde ac uirorum organa occurrunt in figura quintæ musculorum tabulæ agglutinata. Eorum quæ caluaria complectuntur imaginem, præter tabulam neruis commonstrandis paratam, musculorum figuræ satis absolute referunt, ac primum quidem caput primæ figuræ, dein secundæ, mox quartæ simul cum imaginibus quas eius figuræ manus amplexantur, et has subsequitur quæ in sinistra quintæ figuræ manu est obuia, aliaque inibi præter oculi partium effigium humi descendens.

Vale, et nostris conatibus candide uti offeruntur utere.
Basileæ.