TENVI hoc chartarum contextu, maxime Princeps Philippe, qui immortalis tui nominis splendore decoratus, in communem studiorum usum auspicato emittittur, humani corporis historiam enumerationis modo ita partitus sum, singulaque enumeraui, ut præcipua naturalis philosophiæ pars creaturæ omnium absolutissimæ et iuxta dignissimæ fabricam pertractans, imaginis cuiusdam uice operum Naturæ studiosis ob oculos uersari possit, quæ quoad fïeri licet succincte, ac minus operose ea exprimat, quæ septem huius argumenti libris diffuse complexus sum, quorum hæc Epitome semita quædam, aut appendix etiam iure habebitur, capita quæ illis demonstrantur aceruatim comprehendens, omniaque sic semel proponens, ut augurer eam pro tua incredibili humanitate, qua etiam tenuissimum quodque scripti genus alacriter amplecteris, e tuo conspectu non reijciendam, quando ut hac ineunte adhuc ætate tam uarijs uirtutibus exornata, omnium disciplinarum et artium miro amore teneris, ita quoque generosissimi, ac qui uniuerso orbi aliquando præficiatur digni prorsus animi tui domicilium, uel obiter cognoscere iucundum duces, atque summorum Imperatorum, Regum, Consulum exemplo turpe miserumque esse arbitraberis, nos adeo uaria sectantes studia, corporis quod perpetuo circunferimus harmoniam latere, ac hominem sibi ipsi penitus esse incognitum, neque instrumentorum tam diuine ab immenso rerum Opifice structorum compagem perscrutari : quorum munere ea quæ potissimum, et sola prope modum admiramur, alioquin conficiuntur. Verum etsi hac ratione conatus iste tuo omnibus admirabili iudicio forsitan non displicebit, illum tamen medicis adeo nollem reddi familiarem, ut dum prodesse conor, ac in posterum quibusdam sordidorum typographorum mancipijs ad aliorum labores ineptissime in arctum contrahendos, suoque nomine emittendos ad rei literariæ perniciem natis, occasionem præripere studeo, magnopere obsim. Nemo enim nescit, quantum dispendij in scientijs omnibus compendia conciliare soleant. Qandoquidem etsi illa ad perfectam absolutamque rerum cognitionem uiamque quandam rationem præfigere uideantur, ac latius prolixiusque alibi tradita, breuiter uniuersimque contineant, hocque in primis nomine instar indicis et memoriæ sedis censeantur, in quam sparsim scripta rite collocentur, nihilo minus compendia ideo egregie nocent, magnamque literis cladem adferunt, quod illis solum modo addicti, uix quicquam aliud hodie perlegamus, etiam ijs qui se totos disciplinis manciparunt, duntaxat ad scientiarum umbram et superficiem aspirantibus, ac penitius solideue nihil eruentibus. Huius mali quantumuis in omnibus propemodum studijs id late uagari constet, medicorum uulgus grauissime insimulandum est, quod adeo ignauiter hominis partibus dignoscendis operam nauat, ut ne enumeratione quidem ad eas discendas utatur. Quum enim præter cuiusque partis functionem et usum, ipsius quoque situs, figura, magnitudo, color, substantiæ natura, ad cæteras partes connexus ratio, ac eius generis permulta in partium examine medico nunquam satis perspecta esse queant, quotus quisque reperitur, qui ossium, cartilaginum, ligamentorurn, musculorum et uenarum, arteriarum neruorumque frequentissima per totum corpus serie excurrentium, ac uiscerum, quæ in corporis habentur cauitatibus, uel numerum modo tenet ? Vt pestilentes præteream medicos, in communis hominum uitæ exitium grassantes, qui ne unquam quidem sectioni assistere, quum in corporis cognitione nemo aliquod operæ precium præstiturus sit, qui non proprijs manibus, uti Ægyptiorum reges consueuerunt, sectiones obierit, et illas perinde ac simplicia medicamina sedulo frequenterque uersauerit. Vnde etiam nunquam satis laudabuntur prudentissimæ Asclepiadum familiæ, liberos domi ut lectione et scriptura, sic et cadauerum resectionibus exercentes, ut ita edocti, fœlici Musarum omine studijs incumberent. Cæterum hic nostram in Anatome totius medicæ artis basi ac fundamento perdiscenda oscitantiam, et quam nobis qui medicinæ nomen dedimus, pernecessaria sit humanarum partium notitia, haud demonstrandum assumpsi : quum cuiusque conscientia abunde attestetur, in morbis curandis eorum cognitionem primas, secundas ac tertias partes merito sibi uendicare, hancque in primis ab affecta sede peti, debitum quoque (præter alia) auxiliorum usum commonstrante. Quin etiam qui ueteri medicinæ nunc in plerisque gymnasijs pristino nitori propemodum restitutæ dedicantur, assatim intelligere incipiunt quam parum frigideque hactenus a Galeni temporibus in Anatome sudatum fuerit : qui etsi huius procerum facile sit primarius, humanum tamen corpus nunquam aggressus est, et simiæ potius quam hominis ab illius fabrica innumeris sedibus uariantis partes descripsisse (ne dicam, nobis imposuisse) modo colligitur.
Quod autem ad meam attinet audaciam, qua exiguum hoc tua indignum Maiestate munusculum, tanto patrocinio unice commendatum, ancipitem iudiciorum aleam subit, nullam excusationem prætexurus sum, nisi quod hanc salsam molam, qua maxime per studiorum rationem litare datur, tantisper meæ erga patriæ Principem singularis obseruantiæ pietatisque specimen esse uelim, dum thura quoque offerre aliquando dabitur.
  Patauij, Idibus Augusti. Anno a Virginis partu MDXLII.