Ms BIU Santé no 2007, fo 115 ro.
Cl. Viro Thomæ Bartholine, Med. Doctori, Hafniam.
Suavissimam tuam accepi, Vir Cl. per D. Wormium, 29. Aug. datam,
priori meæ responsoriam : sed à mense et ab accepto tuo fasciculo alias scripsi,
tum ut Tibi gratias agerem, tum ut monerem Te de morbo acerrimo, nimirum
affectu dysenterico, D. Flechem, cujus melior valetudo in dies firmatur ; dysen-
teria planè cessavit, adhuc tamen remanet diarrhœa, quæ corpus tam multis
ac varijs excrementis refertum felicissimè deplet. Nosti axioma Hipp. à dysenteria
diarrhœa. Postquam fuerit tanta eluvie corpus repurgatum, spero futu-
rum ut restituatur, ac in meliorem statum reducatur : tunc temporis cogitare
illi licebit de repetenda patria : nec antea tuta est cogitatio, quia nondum
fraxdesijt morbus, quó finito vires erunt reparandæ, et incumbendum neoterismo
per usum lactis asinini et aliorum analepticorum. Postremâ meâ rogabam Te, si
quid mittas in Galliam, ne omittas Tractatum tuum de Paralyticis N.T. ut
et libellum Cornari, Epigrammata tua, cum Disput. Medicis de Pleuritide, Variolis,
Secundinis, et Spicilegio primo : in 4. Tu v. pro tot beneficijs indica mihi quod velis
ut mittam ex Gallia nostra. Dissidium nostrum cum Papa adhuc viget, nec
dicitur tam facilè aut tam citò componi posse. Vive, vale et me ama, vir præstan-
tissime, meóq. nomine Fratres illos tuos omnes, ut et D. Scaven, IC. mihi notum,
nomine meo saluta. Parisijs, 29. Sept. 1662. Tuus ex animo Guido Patin.
