Ms BIU Santé no 2007, fo 151 ro.
Cl. viro D. Seb. Scheffero, Med. Doctori, Francofurtum.
Ecce Tibi responsoriam mitto, Vir Cl. Amici nostri D. Moquillon,
per quem accepi tuam postremam, cum fasciculo et contentis, pro quibus
singulis quantas possum maximas ago gratias. Quos Iconem meam tam
grato animo acceperis, seriò gaudeo : et Ego tuam Epistolam accepi per amicum Metensem,
sed Cognatum tuum non vidi, nec illam tuam Epistolam accepi. Cl. virum D. Voglerum
saluto : cui multa me debere agnosco : et pro quib. gratias agam postquam
accepero quæ mihi destinata sunt à Viro Cl. D. Horstio. Tomos illos
12. hostoricos D. Vorburgij accepi per Tornesios, et pro debita gratiarum
actione scripsi. Chalcographo vestro ingentes gratias debeo, pro quibus
omne genus officiorum polliceor et offero : imò et nummos, de quib. Te judicem agnosco,
et accipio. Si quid Tibi videatur addendum et subjiciendum Iconi meæ, pauca hæc
sodes subscibi curabis. Guido Patin Bellovacus, Doctor Medicus Parisiensis, et Pro-
fessor regius, vivit in senectute bona, et docet Lutetiæ, summa Auditorum fre-
quentia, ex omni gente, ex omni tribu, imò ex tota Europa : multa laude dignus,
omnium eruditorum calculo probatus. Utinam Vir bono publico natus Nestoreos
annos attingat. Cum disticho sequente.
Hic est Patinus, clarus Asclepî nepos,
Per quem perire non licet mortalibus.
Hadrianus Valesius.
Chacolgrapho vestro promitto nummorum quiquid ei debebitur pro libris Elogiorum.
Mart. Schoockij librum de Fermentatione nondum vidi : sed eum expecto cum alijs ex
Hollandia. Gratissimum mihi feceris, si libellos à Te commemoratos miseris per Ochsium,
aut Sebastianum Switzerum. Nostrorum Doctorum Catalogum novum ad Te mittam
per eosdem. Vale Vir Cl. cum Domino Parente, quem Deus servet, et me ama. Parisijs,
die Iovis, 6. Maij, 1663. Tuus ex animo,
Guido Patin.
Cl. Viros nomine meo salutes velim, Lotichium et Horstium, Conringium
et Voglerum, et alios, si qui sint qui rebus nostris faveant.
