Ms BIU Santé n^o 2007, f^o 167 v^o.

Cl. viro D. Io. Georgio Volcamero, Noribergam.

Dum ex Te, Vir Cl. per D. Piques aliquid expecto non invitus, quoniam
vi majori cedendum est, nempe legi et edicto Principis nostri, qui pestilentiæ
metu vetuit ne quæ naves onerariæ mercibus multibus onustæ ex Hamburgo
vel Amstelodamo solventes, Rothomagum appellerent, nisi post Quadra-
genam perfectam, après la Quarantaine ; dum inquam ejusmodi tempus
effluit, ecce Regis edictum rescinditur atque revocatur, propter in his locis
cessantem et sedatam pestilentiam : sicque futurum spero, ut brevi accipiam
quæ jampridem à Te pro nobis empta, hactenus hæserunt in via. x. Martij.
Interea v. Te rogo pro paucis quibusdam libris mihi emendis, quorum hîc
habes Indiculum. Sed ecce dum scribo, pessimus et ingratissimus mihi ad-
fertur nuntius, ex Hollandia, nempe Virum Cl. D. Io. Anton. Vander-
Linden, Leidæ obijsse : de quo fortiter doleo : Hippocratis nostri novam
Editionem adornaverat, quæ ad finem nondum pervenit. Vir fuit optimus ac
eruditionis non vulgaris, et amicus certissimus : utinam Manes ejus placidè quies-
cant. + Verùm, Sed dic sodes, quis ille Phil. Carolus, Prof. Altorphinus, antehac Papista
factur ? Ubinam hodie vivit bonus ille vir, et quid agit ? + Ante quinque menses
Leidæ mortuus est alter Professor Botanicus, vir egregius, D. Ad. Vorstius,
qui dum viveret, fuit vir præstantissimus ac optimus : sicq. duplex vulnus
accepit à paucis mensibus Academia illa Lugduno-Batava. + Verùm, etc.
Nihil hîc habemus novi in re literaria, adeo frigent et turpiter et miserè
nostri Typographi, propter egestatem publicam. Quî valent apud vos
illustres illi Senones, D. Richterus, Felwingerus, Conringius, Rolfinkius, quos
omnes ex animo saluto. Parisijs, x. Martij, 1664.

Tandem exoptatum fasciculum accepi 22. Martij, pro quo Tibi
gratias ago singulares : in eo deprehendi Pharmacopœam illam Olinge-
rianam, et librum D. Felwing. cum Disput. Medicis circiter 30. Scripsit
ad me Leon. Ursinus, Lipsiensis Prof. Botanicus, se per Te aliquid ad
me missurum : quod de ejusmodi Thesibus intelligo. Sumptus omnes grato animo
refundam D. Picques, postquam indicaveris. Hîc agitur de Legato Hispanico,
qui Regem nostrum sibi habet uratum, quod pecunia multa dicatur corrupisse
unum quendam, le Copiste du premier Commis de Monsieur de Lionne, Secretéaire d’Estat, qui
a les affaires estrangeres : proditor ille Regis jussu fuit conjectus in car-
cerem : væ proditori, væ capto, væ misero. Il a été pendu en Greve : il estoit de Nuis en Bourgogne. Nosti ilud Scioppianum :
Legatus est vir bonus, (voluit forsan dicere, callidus,) peregrè missus ad
mentiendum, Reipublicæ causa : vel saltem Regis sui. Vale, et me ama.
Theses illas nuper à me acceptas admodum probo : pro ijs gratias ago, ut et D.
Felwingero : omne pretium paratus sum refundere : Parisijs, 28. Martij, 1664.

Tuus ex asse, Guido Patin.