Ms BIU Santé no 2007, fo 164 vo.
Eidem.
Vir Cl.
Ut officio meo defungerer, imò ut muneri meo satis-
facerem, et eam quam nactus sum Spartam, ornarem pro rei dignitate,
nuper me transtuli ad ædes Filij tui Gregorij Horstij, commorantis in
vico Divi Iacobi, ruë S. Iacques, prope Collegium Patrum Iesuitarum,
chez M. Loüis Gayan, Maistre Chirurgien à Paris, qui est amicus meus à
multis annis, et in dissectionibus Anatomicis peritissimus, ut et in toto illo
mysterio Anatomico, de Circulatione sanguinis, cujus arcana omnia Filij
tui carissimi quamdiu voluerit, oculis subijcientur, hybernis mensibus,
nempe Nov. Dec. Ianu. et Febr. Illius D. Gayan, et ejus uxori, ante
annos 32. mihi notæ, Filium tuum seriò commendavi, ideóq. commendatissi-
mus habebitur. De ejus studijs sic puto statuendum : ut quotidie legat
bonum aliquem librum Medicum, et discat Gallicè loqui, intra menses
duos aut tres : postea incumbat studio Anatomico per totam hyemem :
qua exacta totum se tradat lectioni Pathologicæ et Therapeuticæ :
Ego v. circa initium Martij novas Prælectiones inchoabo, in Schola
regia, si Deus vitam mihi proroget usque ad illum tempus. A mense
Nov. usque ad Aprilem, habentur quoque multæ Disputationes publicæ
in Scholis Medicorum Paris. in quib. Doctores Medici 2 ordine suo, 1 Scholæ, fortiter disputant
adversus Baccalaureum respondentem, in frequenti Auditorum concessu,
quibus singulis actibus interesse poterit Filius tuus. Mense Majo,
sub finem Veris, flores suos extendet atque depromet de sinu suo suavis fragrans
illa Dea : tuncq. duorum Medicinæ Doctorum ductu atque auspicio, re-
novabitur studium AnatomBotanicum, grata varietate refertum, in
Horto Regio, in suburbio S. Victoris, ut et in quibusdam hortis privatis,
et quibusdam publicis, in agris, in sylvis, ubi nova et miranda multa
quotidie occurrunt, et hæc omnia patebunt Filio tuo, qui quæ voluerit,
audiet et videbit à Maijo usque ad Autumnum : Ex his vides Vir Cl.
nihil quidquam illi defuturum ad studij Medici perfectionem : imò et
Chymicas operationes videbit sub peritissimo Chymista Chr. Glaser,
Basilensi, qui fratrem habet Med. Doctorem, Basilæ agentem, meum
olim in Schola regia auditorem. His positis, potes Tibi persuadere et
animum inducere, Filio tuo nihil quidquam defuturum, nequidem frigus hye-
mis mensibus, quod hîc 2 solet 1 esse acerrimum. Interea v. rogo Te ut me
ames, mihique indices, quid ex hac Urbe nostra cupias ut ad Te mittam.
Cl. virum D. Laur. Straussium quàm possum officiosissimè saluto.
Peracto studio Anatomico, etc. au petit billet.
