Ms BIU Santé no 2007, fo 192 ro.
Clarissimo viro D. Diemerbroech, Med. Doctori, Ultrajectum.
Unâ et eadem fideliâ duos parietos dealbabo, Vir Cl. et duabus tuis semel
respondebo. Ambos illos juvenes à Te mihi commendatos vidi, salutavi, peramanter
excepi, quib. officiorum omne genus obtuli, et certè præstabo quotioscumque operâ
mea indigebunt. Tibi me plurimum debere profiteor, quod tam eruditorum
juvenum amicitiam mihi concilies, et utinam possim retaliare. Amicus noster D.
Utenbogardus utinam melius habeat, et hac mitissima tempestate pristinæ vale-
tudini prorsus restituatur. Nihil hîc habemus novi in re literaria : Regina nostra
Parens, Anna Austriaca, cancroso suo tumore adhuc laborat in mamma sinistra, nec
adhuc quidquam contulerunt opis aut levamenti medicastri aulici, aut nebulones sacri-
ficuli, qui antehac salutem pollicebantur : sed sic in aula vivitur, Principes ipsi et
volunt decipi, nec abhorrent aulici quamvis sint astutissimi. De bellico apparatu
inter Anglos et Batavos quotidie novum aliquid opperimur : interea v. Tu, Vir Cl.
vale, et me ama. Parisijs, 16. Iunij, 1665. Tuus ex animo, G.P.
