Ms BIU Santé no 2007, fo 217 vo.
Cl. viro D. Seb. Scheffero, Med. Doct. Francofurtum.
Quamvis antehac ter ad Te scripserim, nempe 17. Iunij, xv. Iulij,
et 4. Aug. mihiq. constet eas Tibi redditas fuisse, nec quidquam responderis, de quo ce[rte]
non parum miror : ecce tamen iterum scribo pro 4. vice, ut Te moneam libros illos vestros Casp.
Hofmanni, ad me transmissos in modiolo ante plures menses, adhuc interceptos hærere atque in-
justè et iniquè admodum detineri à duob. Bibliopolis, qui se profitentur præfectos rei lib et
librariæ : in litem quidem adversus eos descendi, sed nondum est confectum negotium : adhuc sub j[udice]
lis est, qui de re mea et æquitate mentis minùs certè judicat, imò, nimis manifesté [ejus-]
modi nebulorum iniquitati et malignæ pervicaciæ præter æquum favere videtur : spero tamen me [cum]
Dei ope, ab ejusmodi impedimentis liberatum iri, et libros istos recuperaturum. Sed ne [in]
posterum tale quid recurrat, et vetus error novo cumuletur, ideo ad Te scribo h[odie]
et ex professo, ut à Te moneantur vestri Bibliopolæ, ne quid librorum posthac ad [me]
mittant per viam Basilensem, aut quamlibet aliam, nisi antè monitus fuerim, e[am]
viam quoque indicaverim per quam libri mittendi, priùs mihi destinati ac designati
fuerint. Te quoque rogatum velim, ut inquiras de ijs quæ pro me accepisti ante ann[um]
et suprà, ad me mittendis, à D. Io. Theod. Schenkio, Prof. Ienensis : de quorum jactura
graviter certè dolerem. Saluta quæso meo nomine utrumque Horstium, D. Lotichium,
Beyerum et Schonwetterum : à quib. quæso nihil ad me mittatur, nisi priùs antè monitus
fuerim, et viam indicaverim, ut et hominem per quem accipiam, absque ullo simili impedimento.
Rex noster feliciter bellum gerit in Flandria : si eodem pede pergat anno proximo, vide[tur]
Belgium ad nos transiturum, victricibus armis Ludov. 14. quod utinam contingat. Petr[um]
Moquillon saluto. Vale, Parisijs, 6. Sept. 1667. Tuus ex animo, Guido Patin.
