Ms BIU Santé no 2007, fo 65 ro.
Clar. viro D. Melch. Sebizio, Medicinæ Doctori et Prof. Eximio, Argentinam.
Vir Cl.
Quàm bene mecum agetur si tam mihi esses de facie notus,
quàm sæpe et tui nominis, et tuæ summæ in arte medica eruditionis fama Orbem prope
universum pervagata, ad meas pervenit aures : quàm v. multò melius si coram tecum loqui
liceat, et ab ore tuo nitidissimo velut ab uberrimo doctrinæ fonte petere unde
meum rigem ingenium meámq. sitim penitus expleam. Equidem quoties mihi
per tempus datum est legere nonnullas è tuis libris quos habeo repositos inter
authores eruditione principes, ita jucunda eorum lectione meum pavi animum, ut
interim cæterorum quib. carebam legendorum desiderio magis ac magis arserim ;
túmq. maximè ubi aliás à modestissimo juvene Mollero, Lindaviensi Medico,
eorum Indicem accepi, simúlq. me à Te quem amarem, redamari. Quanti
ego Te faciam, quàm Te cum clariss. illis Germaniæ tuæ luminib. Cratone,
Gesnero, Erasto, Reusnero, Scherbio, Sennerto, Hofmanno, olim meo, et alijs fulgentem
suspiciam ac venerer, vix est ut ausim apud Te prædicare : et si prædicem, integram
mihi fidem habeas. Ex eo tamen poteris utcumq. intelligere, quod tam nihil in votis habeam,
quàm ut illos è tuis libris quos ex tuo Indice deficere me comperi, mihi quamprimum
potero comparem. Id tuo jussu tuáq. authoritate facilè ut confido fiet, si
quod ego Te per Apollinem rogo, jubeas tuum Bibliopolam eos omnes ad me mittere
per D. Dynckel, cui impensam isti rei pecuniam omnem statim rescribam ac re-
præsentabo. Hoc tuo me beneficio Tibi addictiorem ac simul doctiorem efficies. Vale Vir cl.
Tuus ex animo Guido Patin, Bell. Doctor Med. Paris. et Prof. regius.
Parisijs, die Ven. 2. Nov.
1657.
